Dewisiadau Tai i Bobl Hŷn

Mae gwybodaeth am sut i gynyddu maint y print ar gael yma.

Mae symud i gartref llai yn opsiwn i berchnogion cartref a thenantiaid.

Fel perchennog cartref,gall symud i eiddo llai olygu bod gennych arian i'w fwynhau yn ystod eich ymddeoliad, a lleihau eich biliau a chostau cynnal a chadw. Gall gwerthwyr tai lleol a gwefannau eich helpu i ddod o hyd i gartref addas.

Gall tenantiaid y Cyngor a Chymdeithasau Tai wneud cais i gyfnewid â thenant arall, neu symud i eiddo llai. Dan eu Cynllun Tanfeddiannu, mae Cyngor Caerdydd yn cynnig cyngor a help ymarferol i'w denantiaid i symud i lety llai - gan drefnu'r broses o symud popeth a chynnig cymorth drwy, er enghraifft, roi gwybod i'ch darparwyr nwy, trydan a ffôn eich bod wedi symud. I gael rhagor o wybodaeth am y Cynllun hwn ffoniwch 029 2053 7366.

Os ydych yn rhentu'n breifat, ac eisiau parhau i wneud hynny, gallwch chwilio am eiddo llai drwy asiant gosod neu ar-lein.

Mae llawer o bobl sy'n byw'n annibynnol yn eu cartref eu hunain yn cael gofal gan aelod o'r teulu neu gyfaill mewn modd anffurfiol sy'n eu galluogi i ymdopi o ddydd i ddydd. Os yw'r un peth yn wir amdanoch chi, cofiwch fod gwasanaethau ar gael yng Nghaerdydd i gefnogi eich gofalwr. Mae Llawlyfr Gofalwyr Cyngor Caerdydd yn cynnig gwybodaeth am yr amrywiaeth o wasanaethau a help sydd ar gael (gan gynnwys gofal seibiant i roi seibiant byr i'ch gofalwr, a chymorth ariannol) a sut i gael gwybodaeth am y rhain.

Os nad oes gennych ofalwr, neu os oes angen mwy o gymorth na'r hyn y gall ei roi, efallai y gall y Cyngor drefnu gwasanaethau i chi. Gallai hyn gynnwys help gyda phethau fel codi o'r gwely a gwisgo yn y bore, help yn y cartref, a chael prydau wedi'u hanfon i'ch cartref. Cynigir asesiad i chi i ganfod pa fath o ofal a chymorth sydd ei angen arnoch a ph'un a all y Cyngor roi'r gofal a'r cymorth hwn i chi. Mae'r asesiad am ddim, ond codir ffi ar gyfer gwasanaethau os oes gennych incwm neu gynilion uwchben lefel benodol.

I roi tawelwch meddwl i chi, gallech gael Larwm Cymunedol i sicrhau y gallwch alw am help unrhyw bryd drwy bwyso botwm, neu gael gwybodaeth am drefniadau Teleofal sy'n cynnig hyd yn oed mwy o sicrwydd i chi.

Os oes gennych ddiddordeb mewn symud, mae Cyngor Caerdydd a Chymdeithasau Tai yn y ddinas yn cadw rhai o'u heiddo i bobl hŷn yn unig. Byngalos a fflatiau yw'r rhain yn bennaf, ac mae rhai ohonynt yn cynnig cymorth Rheolwr Cynllun i helpu pobl mewn argyfwng, a chyda materion o ddydd i ddydd os oes angen. Gelwir eiddo sydd â'r math hwn o gymorth yn 'llety gwarchod' - lle mae tenantiaid yn byw'n hollol annibynnol, ond gyda'r sicrwydd bod eu cymdogion o'r un oed â nhw fwy neu lai.

Os ydych yn rhentu eich cartref, cysylltwch â'ch landlord yn y lle cyntaf i gael gwybod os mai chi sy'n gyfrifol am yr atgyweiriadau neu os gallan nhw helpu.

Mae Gofal a Thrwsio Caerdydd yn helpu pobl hŷn gydag atgyweiriadau, gwelliannau ac addasiadau, yn amrywio o ollyngiad dŵr bach i osod rheiliau neu newid to. Maen nhw hefyd yn cynnig:

• cyngor ar effeithlonrwydd ynni i'ch helpu i gadw'n gynnes a chadw'ch biliau mor isel â phosibl
• gwiriad budd-dal lles i sicrhau eich bod yn derbyn yr holl arian yr ydych yn gymwys iddo
• gwiriad i leihau peryglon a'r risg o ddisgyn yn eich cartref
• gwasanaeth cyfeirio at wasanaethau a gweithgareddau eraill a allai fod o gymorth neu o ddiddordeb i chi.

Cysylltwch â nhw ar 029 2047 3337 i gael rhagor o wybodaeth.

Os hoffech aros yn eich cartref presennol, ond eich bod chi'n cael trafferth ymdopi oherwydd eich anabledd (neu oherwydd bod aelod arall o'ch cartref yn anabl) mae help a chyngor ar gael. Ewch i'r tudalennau 'gwelliannau i'r cartref' ar y wefan hon i gael rhagor o wybodaeth am yr help ymarferol ac ariannol a allai fod ar gael i chi.

Os ydych yn teimlo na allwch ymdopi gyda gofal gartref, neu gyda'r lefel o gymorth a gynigir gan lety gwarchod, edrychwch ar y cynlluniau Extracare yng Nghaerdydd. Mae'r math hwn o lety yn cynnig gofal a chymorth 24 awr, tra'n eich galluogi i gadw eich annibyniaeth mewn fflat hunangynhaliol. Mae Cyfeirlyfr Gwasanaethau Gofal Caerdydd yn cynnwys manylion cynlluniau Extracare a'r holl opsiynau tai â chymorth eraill sydd ar gael yn lleol, a sut i fanteisio ar y rhain.

Efallai bod yr amser wedi dod i ystyried symud i gartref gofal. Nid yw hwn yn benderfyniad rhwydd i'w wneud ac efallai y bydd taflen 'Meddwl am Fynd i Gartref Gofal?'Llywodraeth Cymru o ddefnydd i chi. Mae'n bwysig eich bod chi'n dewis y cartref sy'n iawn i chi felly defnyddiwch Gyfeirlyfr Gwasanaethau Gofal Caerdydd a gwefan Cyngor Caerdydd am ganllaw ar bethau i'w hystyried cyn parhau, ac i gael manylion am gartrefi gofal yn y ddinas.

Os ydych yn denant i'r Cyngor neu Gymdeithas Tai ac eisiau symud i ardal arall (efallai i fyw'n agosach at y teulu), cysylltwch â'r Cyngor yn yr ardal honno a gofynnwch a allwch ymuno â'u rhestr aros am dai. Er bod galw uchel am lety Cyngor a Chymdeithasau Tai yn y mwyafrif o ardaloedd, mae'r amser aros ar gyfer llety gwarchod fel arfer yn llai - gofynnwch am gyngor o ran y mathau o eiddo ac ardaloedd a gynigir gan amlaf, a siaradwch â'ch teulu os nad ydych yn gyfarwydd â'r ardal. www.homeswapper.co.uk i chwilio am eiddo addas mewn ardal newydd, am ddim.

Os ydych yn berchen ar eich cartref cysylltwch â'ch asiant lleol i gael eich cartref wedi'i brisio - mae wastad yn werth cael mwy nag un safbwynt. Bydd gwefannau lleol yn eich helpu i gael syniad o brisiau eiddo yn yr ardal yr ydych eisiau symud iddi a phenderfynu p'un a allwch fforddio symud ai peidio.

Gallwch hefyd ystyried rhentu'n breifat yn yr ardal newydd. Dyma'r ffordd gyflymaf o symud gan fod cyflenwad da o lety rhent preifat yn y mwyafrif o drefi a dinasoedd. Cofiwch -os ydych eisiau rhentu eich cartref presennol, mae angen i chi roi rhybudd i'ch landlord yn unol â'ch cytundeb tenantiaeth.